Алматыдағы жаппай тәртіпсіздік кезінде қару-жарақ дүкенінен ұрланған мылтық Жамбыл облысының 27 жастағы тұрғынынан тәркіленді. Қарақшыны қаланың криминалдық полиция қызметкерлері ұстаған.
«Ұстау іс-шарасы Әуезов ауданының аумағында болды. Қаңтардағы жаппай тәртіпсіздіктер кезінде аңшылық дүкеннен ұрлық жасады деген күдікпен 1995 жылы туған азамат ұсталды. Қылмыскердің олжасы 12 калибрлі «SIBERGUN» маркалы тегіс ұңғылы мылтық болды. Заттай айғақтар тәркіленді және сотқа дейінгі тергеудің бірыңғай тізіліміне ҚР ҚК-нің 291-бабы 2-бөлігі бойынша тіркелген қылмыстық іс материалдарына біріктірілді», — деп хабарлады Алматы қалалық ПД криминалдық полиция басқармасының бастығы, полиция полковнигі Қуатбек Науатов.
Белгілі болғандай, ұсталған азамат бұрын да тонау жасағаны үшін сотты болған.
Департаменттің мәліметінше, қазіргі уақытта күдіктінің осыған ұқсас қылмыстарға қатысы бар-жоғы тексерілуде.
