Түркістан облысы Ордабасы ауданында алаңсыз футбол ойнап жүрген жігіт көлігінен айырылды. Оны байқаған тұрғын дереу полицияға арызданған. Айтуынша, стадион алдында тұрған «Нексия» көлігін белгісіз біреу айдап кеткен.
«Аталған жайтты полицейлер Қылмыстық кодекстің 200-бабы «Автомобильді немесе өзге де көлік құралын жымқыру мақсатынсыз құқыққа сыйымсыз иеленіп алу» бойынша тіркеуге алып, бірден іске кірісіп кетті. Небәрі тәулік ішінде жәбірленушінің көлігі тұрған орын мен күдіктінің жеке басы анықталды. Көлік иесіне қайтарылды. Оқиғаның толық мән-жайы тергеу барысында анықталады»,-деді облыстық Полиция департаментіндегілер.
Белгілі болғандай, ұрланған көлік дүкен алдынан табылып, заңды иесіне қайтарылған. Ал оны айдап кеткен ер кісі мас халде келе жатып, стадионның алдында есігі кілттеусіз тұрған көлікті көріп, мініп кеткен.
