Алматыда келіп түскен анонимді хабарламадан соң қалалық сот ғимараты қоршауға алынды. Судьялар мен ғимаратқа келушілердің барлығы шұғыл эвакуацияланды. Қалалық соттағылар мұның себебін келіп түскен күдікті хабарламамен байланыстырып отыр.
«Бүгін Алматы қалалық сотының канцелярриясына түрлі сипаттағы қоқан-лоққы жазылған хабарлама келіп түсті. Бірден ғимарат қоршауға алынып, барлық судьялар мен қызметкерлер эвакуацияланды. Осыған байланысты қазіргі уақытта сот ғимараты тексеріліп жатыр. Сот процестері кейінге шегерілді, түсіністікпен қарауды сұраймыз», — делінген қалалық сот хабарламасында.
Қалалық Полиция департаментіндегілер ғимаратқа жарылғыш зат қойылғаны туралы анонимді хабарлама келіп түскенін айтты. Қазіргі таңда ғимаратты сапер мамандары тексеріп жатыр.
