395
Қазір Чинарев ауылын су қоршап тұр. Бірақ арнасынан асқан өзен суы үйлерге жетпеген. БҚО ТЖ департаментінің күшімен 20 тұрғын көрші ауылдағы мәдениет үйіне көшіріліпті. Олардың төртеуі – балалар. 11 адам құтқарушылардың көлігінде түнеп шыққан. Ал қалған тұрғындар туыстарының үйіне орналасыпты. Сонымен қатар 250 бас мал қауіпсіз жерге шығарылған. Бақылау бекеттерін орнатып, құм салынған 1185 қап әзірлеген төтеншеліктер қазір ауыл ішіндегі дамбаны да бекітіп жатыр. Топан суға қарсы күреске 128 адам (37 техника, 3 қайық, 8 мотопомпа) жұмылдырылған.
Еске сала кетейік, БҚО-мен шектесетін Ресей ауылында су қоймасын су жырып кеткен еді. Ресейдің Орынбор облысы бойынша ТЖ министрлігі бөгетті қалпына келтіру жұмыстарын бүгін бастайтынын хабарлады.
