Елімізде мектеп оқушылары жазғы уақытта 1 маусым мен 1 қыркүйек аралығында демалады. Бұл туралы Оқу-ағарту министрлігіндегілер мәлімдеді.
Ведомствадағылар мамандардың ұсыныстары мен ғылыми зерттеулерінің нәтижелеріне зерттеу жүргізіпті. Осыған дейін мамандар оқу жылын маусым айының соңына дейін ұзарту және оқу жылын 20 тамыздан бастау мәселесін қарауды сұрап, министрлікке бірнеше рет жүгінген екен.
Сарапшылар Қазақстан әлемдегі ең ұзақ каникул — 130 күн болатын елдердің қатарына кіретінін алға тартқан. Ал басқа да елдерде каникул мерзімі 80-нен 100 күнге дейін. Сонымен қатар 5 күндік оқу аптасына көшкен кезде оқу күндерінің саны бірден 34 күнге азайған. Осылайша орта есеппен алғанда елдегі оқу күндерінің жалпы саны шамамен 150 күн болса, дамыған елдерде бұл шамамен — 200 күн. Сондай-ақ мамандар қосымша оқу апталарының қосылуы күнделікті сабақ санын, яғни мұғалімнің де, оқушының да күнделікті оқу жүктемесін азайтатынын атап өткен. Алты күн білім беретін көптеген мектеп жаңа талапқа сай бес күндік оқу аптасына ауыса алады. Бұл педагогтар жұмысының тиімділігін арттырып, оқушылардың материалды меңгеруіне ықпал етеді. Бұл шешімдер күрделі тақырыптарды оқудың қарқынын төмендетеді, оқылған материалды қайталауға және бекітуге уақыт береді.
«Бұл ретте өзгерістер жазғы демалысқа әсер етпейтінін түсіну маңызды. Яғни, балалар 1 маусым мен 1 қыркүйек аралығында демалады. Оқу жылын ұзартуды қолдаушылар 4-тоқсанды 20-25 маусымға дейін созуды және оқуды 20 тамыздан бастауды ұсынып отыр. Мамандар бірнеше жылдан бері дабыл қағып, оқушыларымыздың жазғы уақыттарын компьютер мен смартфондарда ойын ойнаумен өткізіп жатқанда, олардың қатарластары білім алып, оқып жатқанын айтып келеді. Олар бұған дейін де өз дәлелдерін келтірген болатын. Біз ғалымдар, психологтар, ата-аналар мен педагогтарден құралған жұмыс тобын құрдық. Халықаралық тәжірибе де зерделенді. Жұмыс тобы мамандардың ұсыныстарын қолдамай, баламалы ұсыныс енгізді: оқу жылының басталу мерзімін өзгертпей, оны бұрынғыдай 1 қыркүйекте қалдыру. Ал оқу жылының аяқталу мерзімін 31 мамырға белгілеу. Осылайша, каникулға шығудың айырмашылығы небәрі 5 күн болады. Ал жаз басталғанда, яғни 1 маусымнан бастап балалар демалысқа шыға алады», — деді Мектепке дейінгі және орта білім комитеті төрайымы Гүлмира Кәрімова.
Сонымен қатар жаңа оқу жылынан бастап мектептерде апталық оқу жүктемесін азайту жоспарланып отыр екен. Одан бөлек, оқу жылының ұзақтығын созу оқушыларға қосымша білімге көбірек уақыт бөлуге мүмкіндік береді. Өйткені сабақ аз болады, мектептердің кабинет қорына түсетін жүктеме де азаяды», — деді Мектепке дейінгі және орта білім комитеті төрағасы Гүлмира Кәрімова.
Салыстырмалы түрде алып қарайтын болсақ, Германия, Англия және Жапонияда жазғы демалыс 7 апта, Польша, Қытай және Оңтүстік Кореяда 7-9 апта, Финляндия, Венгрия, Швецияда 9-11 апта, Латвия, Италия және Португалияда 11 апта, Қазақстанда — 14 аптаға созылады.
