Шымкентте жалған нөмір таққан көлік жүргізушісі ұсталды. Жедел басқару орталығының қызметкерлері рейд кезінде «Сергек-қорғау» қосымшасының көмегімен жалған мемлекеттік нөмір таққан «ВАЗ-21014» маркалы автокөлікті байқаған. Жүргізушіні тоқтатып, тексеру барысында белгілі болғандай, азамат ресейлік нөмірді қазақстандық нөмірге ауыстырып алған.
«Патрульдік полиция полкінің қызметкерлері жергілікті тұрғынға қатысты ҚР ӘҚБтК-нің 590-бабы 4-бөлігі (көрінеу жалған мемлекеттік тіркеу нөмірлік белгілері бар көлік құралын басқару) бойынша әкімшілік хаттама толтырды. Жиналған материалдарды шешім қабылдау үшін сотқа жіберді» делінген қалалық Полиция департаментінің мәліметінде.
Айта кетейік, қалада «Сергек-қорғау» қосымшасы енгізілген сәттен 123 964 әкімшілік құқықбұзушылық тіркелген. Оның ішінде 62 жүргізушінің көлігіне жалған нөмір тағып алғаны анықталған.
