Бәйдібек ауданының 46 жастағы тұрғыны «Асқазан-ішектен қан кету, ауыр дәрежелі деңгей» диагнозымен Облыстық клиникалық ауруханаға жедел жәрдем көлігімен жүгінген болатын. Науқас қазір Шымкент қаласының жұқпалы аурулар ауруханасының жансақтау бөлімінде жатыр.
«Бүгінгі күнге науқастың жалпы жағдайы интоксикация мен геморрагиялық синдромға байланысты ауыр дәрежеде. Науқас оқшауланып, қалалық жұқпалы аурулар ауруханасының жансақтау бөлімшесінде «КҚГҚ расталған жағдайы, ауыр дәрежелі деңгейде» диагнозымен ем алуда», — деп хабарлайды Шымкент қаласының санитариялық-эпидемиологиялық бақылау департаментінің баспасөз хатшысы.
Қазір науқаспен қарым-қатынаста болған 15 адам анықталды. Оның ішінде 9 адам — медициналық қызметкерлер, барлығы медициналық бақылауға алынды. Індеттің алдын алу мақсатында кешенді эпидемиологиялық, зоопаразитологиялық және ветеринарлық алдын алу іс шаралары тиісті мамандармен жалғасуда.
Айта кетейік, Шымкент қаласы Конго-Қырым геморрагиялық қызбасы ауруынан қолайсыз аймақтар қатарына жатады. Өткен жылы кене шағудан келетін кеселдің екі жағдайы тіркелген.
