Шымкентте халықаралық туризм күніне орай ақпараттық тур өтіп жатыр. Шараға Қазақстан мен алыс-жақын шетелдерден 60-қа жуық маман қатысуда. Олардың қатарында белгілі туроператорлар мен фотограф-видеографтар, travel-блогерлер бар.
Осыған байланысты қалалық туризм және сыртқы байланыстар басқармасының басшысы Ерлан Қыдыров баспасөз мәслихатын өткізді.
Ведомство басшысы тур жайлы толығырақ таныстырып, жергілікті туристік бизнес өкілдерін айтулы күнмен құттықтап өтті.
“Бүгін — Халықаралық туризм күні. Сол себепті ақпараттық турымызды да осы күнге жоспарладық. Шет елдерден және Қазақстан қалаларынан жалпы саны 60-қа жуық қатысушы келген. Олардың қатарында туроператорлар, фотограф-видеографтар, travel-блогерлер мен журналистер бар. Біз бұл іс-шара арқылы Шымкентіміздің тарихын, мәдениеті мен туристік орындарын жан-жақты көрсетеміз. Қызығып, арнайы келіп жатқан туристерге алғыс білдіремін”, — деді Ерлан Қыдыров.
“Visit Shymkent” тарапынан ұйымдастырылған ақпараттық тур 3 күнге созылған. Қазақстанның түкпір-түкпірінен және Ресей, Өзбекстан мен Түркиядан келген қонақтар Шымкент пен қалаға жақын орналасқан туристік орындармен, мәдениеті және гастрономиясымен танысуда.
Жалпы, тур аясында Цитадель, “Бәйдібек би” ескерткіші, А. Асқаров атындағы дендросаябақ, Зообақ, қолөнер орталықтары, “Бозжыра” ұлттық тағамдар рестораны және өзге де қаланың, қалаға жақын орналасқан туристік орындардың тарихымен танысу жоспарланған.
