Қала іргесіндегі жаңа құрылыс саналатын Нұршуақ шағын ауданы тұрғындарының алтын бұйымдары, ақшалай заттары, тұрмыстық техникаларымен қоса құрылыс материалдары да ұрланып жатыр. Ораза айында тіпті ұрлық өршіп кетті дейді тұрғындар.

— Ораза айында үйден аттап шығуға қорқып қалдық. Бір түнде төрт үйді тонап кетті. Ауылға ауызашар өткізіп келемін дегенімше алтындарымыз бен ақшамызды сыпырып кетіпті, — деді Нұршуақ шағын ауданының тұрғыны Ержан Бектаев.

Тұрғындардың сөзінше, ұрылар жалғыз емес. Алыстан да келмеген секілді. Өткені кімнің үйінде қай уақытта болатынын жақсы біліп алған дейді нұршуақтықтар. Жанболат Қалдыбаевтың жылу қазандығы қолды болған:

— Ұрлық 23-сәуір күні түнде болған. Кешкі сағат тоғыздар шамасында үйімді құлыптап қалаға қарай кеттім, екі сағаттан кейін келдім. Келсем сыртқы есік ашық тұр. Ұрылар құлыпты бұзып кіріпті. Терезеде арнайы тор болғасын оны бұза алмағаны көрініп тұр. Арнайы дайындалып келген деп ойлап тұрмын. Өйткені пешті сындырмастан, жұлмастан мұқият шешіп алған. Мұржасына дейін шешіп әкеткен. Оны бір адам көтере алмайды. Бұл жерде ұйымдасқан топ болып тұрғаны анық. Ал полиция арызды жазып алғанымен әлі өзгеріс жоқ. Сол түні бұл төңіректе тоғыз үйге ұры түсіпті. Оны учаскелік инспекторлардың өздері айтты.

Ұрылар кейбір үйлердің терезесінің темір қоршауы жоқтығын пайдаланып жүр екен. Әсіресе, құрылыс қарқынды жүріп жатқан Нұршуақта құрылыс материалдары, құрал-саймандар көптеп ұрланып жатыр екен.

Жанар Аманова, Нұршуақ шағын ауданының тұрғыны:

-Біздің үйден жылу жүйесінің пешін, су жылытқышты, қымбат-қымбат құрылыс саймандарын алып кеткен. Асықпай қораптарына салып алған. Алған заттардың бәрін терезе арқылы шығарыпты. Қазіргі есебімше 1 млн теңге шығын келіп тұр. Ішпей-жемей үй салып жатырмыз, ұрыға жем болайын деген ойымыз жоқ. Бірақ сол күні шақыртуға келген оннан астам полиция өкілі ұрылардың ұсталатынына өздері де сеніп тұрған жоқ. Хаттама толтырды. Күйеуіме айтып кетіпті: «жаңа қазандық ала бересіздер-ау, табылмайды-ау..» деп. Сонда олардың мінедітен тек хаттама толтыруға ғана кіреді ме?..

Жаңа құрылыстағы ағайын былтырдан бері ұрлық өршіп тұрғанын айтып шырылдап жатыр.

Құрал Тунаев, Нұршуақ шағын ауданының тұрғыны :

Ұрылардың еркінсіп кетуіне біздің көшелердің жарықтандырылмауы да себеп болып тұр деп ойлаймын. Учаскелік инспекторымызды тіпті танымаймыз да.Әр жиналыста шақырмыз, әрқайсысы бір келеді. «Мен жаңадан келдім, мен кеше келдім, мен ана жақтан ауысып келдім…деп айтып жатады. Мәселен, мен 2019 жылы көшіп келгем осы жерге. Екі жағымдағы көршімнің үйіне де ұры түсті. Содан бері өзім жұмысты қойдым. Қашан тонап кетеді екен депқорқып жүреміз. Ұйден ұзамайтын болдық. Учаскелік инспектордың жұмысын қазір өзіміз атұарып жүрміз. Бөтен күдік тудырған адам болса барып сұрап шығамыз неғып жүргенін. Қай күні бір телевизорды шөптің арасынан тауып алыпты балалар, ұрылар тыққан жерін таппай қалған ғой деймін, шамасы.

Тұрғындар осы шағымды жергілікті билікке жеткізген. Соңғы тәуліктерде ғана көшелерде бір мезгіл полиция көліктері бір аралап шығып жүргенін жеткізді.

Полиция департаментіндегілер ұрлықтың ашыла бастағанын хабарлады.

«Нұршуақ мөлтек ауданы бойынша Абай аудандық Полиция басқармасында жыл басынан бері 6 пәтер ұрлығы тіркелген. Алтауының бүгінгі таңда біреуі ашылып отыр, бесеуі ашылмаған. Көбінесе ұрылар атын бұйымдар, ақша, сосын құрылыс заттарын алып кеткен.Қазіргі таңда Полиция департаменті бастығының бұйрығымен, генерал Дәлбековтің арнайы жедел тергеу тобы құрылды. Осы жедел тергеу тобы 15 адамнан құрылған, барлығы криминалдық полиция басқармасының тәжірибелі мамандары, солар осы қылмысты ашуға бағытталған бірәз жұмыс, ауқымды жұмыс атқарып жатыр. Бұл жұмыс нәтижелі болады деген үміттеміз. Нұршуақта ешқандай полиция тіректері жоқ. Қазір осы мәселе де қарастырылып жатыр. Бұл аумақта 18 мың халыққа үш-ақ учаскелік инспектор. Осы жағын да назарда ұстап отырмыз, — деді Полиция департаменттің ресми өкілі Салтанат Қаракөзова.