Желіге тараған бейнежазбасы 28-наурыз күні түсірілген, -деді Түркістан облыстық Полиция департаментінің баспасөз хатшысы Гүлнәр Әбдірахманқызы.
«Бейнежазбадағы әйелдің үйіне Жетісай ауданының полиция мен прокуратура қызметкерлері барып, жағдайын білді. Тексеру кезінде бұл жағдай 28.03.2022 жылы болғаны анықталды. Әйелдің үйіндегі жанған зат сол мезетте сөндірілген, балаларына ешқандай қауіп төніп тұрған жоқ. Полицейлер әйелге түсіндіру жұмыстарын жүргізді. Бұл отбасы құзырлы орындардың бақылауына алынды».
Жетісайлық Асабаева Ақмарал есімді 1986 жылы туған келіншек үйінің ішінде өрт тұтатып, өзіне және балаларына қол жұмсайтынын, себебі қиындықтан, жоқшылықтан, қысымнан шаршағанын айтқан болатын. Төрт баланың анасы бұл жағдайға ашумен барғанын айтып отыр.
— Балаларымның жағдайы жақсы. Кеше ашу-ызамен баларыма емес, именно өзіме,.. балаларыма ешқандай зияндық жасамаймын. Балаларым ешқандай зиян да көрмейді. Ашумен істелген әрекет болды. Бұл жағдай өзіме де қайталанбайды енді. Балаларымның жағдайы бірқалыпты. Өте тамаша жағдайлары, балаларыма жақсы қараймын. Ертең Алла қаласа «Ана мен бала» оңалту орталығына жол жүреміз,- деп айтылған Полиция департаментіндегілер таратқан бейнежазбада.
Ал Жетісай аудандық әкімдігіндегілердің берген мәліметінше, Ақмарал Асабаева соңғы төрт жылдан бері бала күтімімен үйде отыр.
— 1986 жылы туған келіншек аудандағы орталық ауруханада медбике болып жұмыс істейді. Толыққанды отбасы. Күйеуінің де тұрақты жұмысы бар. Төрт баланың екеуі мектепте оқиды. Ақмаралдың отбасы пандемия кезінде де барлық атаулы әлеуметтік көмектерді кедергісіз алып келді. Жағдайлары жақсы. Оның отбасына үй алып беруге де әкімдік тарапынан көмек берілген. Тіпті бірәз қарыздарын өтеп беруге әкімдік тарапынан демеушілер ұйымдастырылған ,- деді аудандық әкімдіктің баспасөз хатшысы Бейбіт Қазыбеков.
