Жетісайда базардағы өртке байланысты құрылған комиссия ондағы кәсіпкерлермен кездесті. Комиссия төрағасының айтуынша, айтып келмейтін апаттан зардап шеккен халыққа көмек беріледі.
«Базар иелерімен келіскендей, өртенген базар 20 күнде қалпына келтіріледі. Жөндеуден өткен соң кәсіпкерлер базарда 1 жыл тегін отырады. Сондай-ақ салық органдарымен бірлесіп салық төлеу мәселесі де қарастырылады. Облыс әкімінің тапсырмасына сәйкес, келтірілген шығындарды өтеу үшін қор құрылады. Комиссия төрағасы ретінде базардағы кәсіпкерлермен бірлесе отырып, қорға түскен қаражаттан шығындарды өтейміз»,-деді комиссия төраасы әрі облыс әкімінің орынбасары Сәкен Қалқаманов.
Төтенше жағдай салдарын жою комиссиясының бастамасымен банктер және кредиттік ұйымдармен кәсіпкерлердің несиесін төлеуде кем дегенде бір жылға каникул алуға келіссөз жүргізіледі. Сонымен қатар жеңілдетілген несие беру бойынша да жұмыстар қолға алынбақ.
Еске салсақ, кеше Жетісай қаласындағы орталық «Күлпаршын» базары өртеніп кеткен болатын.
