Мемлекеттік бағдарлама аясында кезектен тыс пәтер алмақ болған Шымкент тұрғыны алаяқтың құрбаны болды. Жәбірленушінің айтуынша, танысы баспана алуға көмек беремін деп ол үшін 5 миллион теңгесін алған. Алайда уәдесін орындамаған, ақшаны қайтармаған.
Қалалық Полиция департаментінің мәліметінше, аталған жайт Қылмыстық кодекстің 190-бабымен (Алаяқтық) сотқа дейінгі тергеп-тексерудің бірыңғай тізіліміне тіркелді.
Жедел-іздестіру жұмыстары нәтижесінде күдікті ер кісі қала аумағынан ұсталды. Ол Шымкент қаласының тұрғыны болып шықты. Жасы – 24-те, жұмыссыз. Бұрын-соңды сотты болмаған. Жас жігіт мұндай қылмысқа қордаланып қалған қарыздарынан құтылу мақсатында барған екен. Оңай жолмен тапқан ақшаны қарыздарына таратып берген. Қазіргі кезде күдіктінің осыған ұқсас басқа да қылмыстарға қатысы бар-жоқтығы анықталып жатыр. Тергеу амалдары жүргізілуде.
