Қазақстанда күштілігі жоғары ликер-арақ өнімін, коньяк пен брендиді ең төмен бөлшек сауда бағаларынан төмен бағамен бөлшек сауда өткізгені үшін енді айыппұл салынады. Бұл туралы Мемлекеттік кірістер комитетіндегілер айтты.
«Этил спирті мен алкоголь өнімінің өндірілуін және айналымын мемлекеттік реттеу туралы» Қазақстан Республикасының Заңына толықтырулар енгізілгені белгілі. Онда арақ пен күштілігі жоғары ликер-арақ өнімдерін, коньяк пен брендиге ең төменгі бөлшек сауда бағаларын белгілеу көзделген. Осыған байланысты Әкімшілік құқық бұзушылық туралы кодекстің 282-бабы 3-тармағының 4-бөлігіне арақтарды және айрықша арақтарды, тауар шығарылған жердің атауы қорғалған арақтарды, күштілігі жоғары ликер-арақ өнімдерін, коньяк пен брендиді өткізу кезінде ең төмен бөлшек сауда бағаларын бұзғаны үшін әкімшілік ықпал ету шараларын қолдану бойынша өзгерістер енгізілді (2022 жылғы 11 қыркүйектен бастап күшіне енді), коньяк пен бренди ең төмен бөлшек сауда бағасы 2 930 теңгені құрайды» делінген комитет берген мәліметте.
Бұл өнімдерді төмен бағада сатқандар алкогольді сусындар тәркілей отырып, әкімшілік жауапкершілікке тартылатынын еске салады.
