Розыбакиев көшесінде орналасқан тәулік бойы жұмыс істейтін азық-түлік дүкеніне сатып алушы секілді кірген ол кассадағы ақшаны ұрлап кеткен. Өз өмірлеріне қауіптенген күзетші мен кассир тонаушының талабын орындаған. Дүкендегі тонау оқиғасы ондағы бейнебақылау камерасына түсіп қалған.
«Бір тәуліктен кейін полицияның арнайы жасағының көмегімен күдікті қолға түсті. Ол дәмханалардың бірінде даяшы болып жұмыс істейді. Оның жұмыс орнындағы қызметкерлерге арналған киім ауыстыратын бөлмеден заттай айғақ сақталған сөмке табылды. Атап айтқанда, оттық түрінде жасырылған мылтық, күдіктінің тонау кезінде киген киімдері мен басқа да құралдар», – деді Алматы қалалық Полиция департаменті бастығының орынбасары, полиция полковнигі Дидар Аханов.
Ведомства мәліметінше, күдікті Шымкент қаласының тұрғыны. Алматыда күнкөріс қамымен жүрген оның табысы көбінесе қылмыстық сипатта болған.
«Оның азық-түлік дүкендеріне жасалған тағы екі қарақшылық шабуылға қатысы бар екендігі анықталды. Қылмыстардың қолжазбасы бірдей. Сараптама жүргізу үстіндеміз. Күдікті уақытша ұстау изоляторына қамалды», – деді департамент бастығының орынбасары.
