Ақмола облысы, Көкшетау қаласында өз әйелін қызғаныштан пышақтап өлтірген 52 жастағы ер кісі сотталды. Қанды оқиға биыл ақпан айында болған. Спирттік ішімдік ішкен азамат әлдекіммен телефонмен сөйлескені үшін әйелін пышақтаған. Пышақ жәбірленушінің іш қуысына қатты кіріп кетіп, ол оқиға орнында көз жұмған.
Ақмола облыстық Полиция департаментінің мәліметінше, көкшетаулық тұрғын өз кінәсін мойындап, жасаған ісіне өкінетінін айтқан.
«Күдіктінің кінәсі сот сараптамасы арқылы дәлелденді. Сот оны Қылмыстық кодекстің 99-бабының 1-бөлігі бойынша кінәлі деп таныды. Оған қатаң режимдегі колонияда 9 жылға бас бостандығынан айыру жазасы тағайындалды. Сотталушы зардап шеккен тарапқа 5 миллион теңге көлемінде моральдық зиян өтемақысын төлеуге міндеттелді», – деді ведомствадағылар.
