Шымкентте ішімдік ішіп алып, тамақ әзірлеген 43 жастағы әйел баласымен бірге уланып қала жаздады. Оқиға 17 шағындаудандағы көпқабаттың үйлердің бірінің пәтерінде орын алған.
Өрт сөндірушілерге 7 тамыз сағат 14:48-те өрт шыққаны туралы хабарлама жергілікті тұрғындардың бірінен келіп түскен. Олардың айтуынша, пәтерден 3 жасар баланың жылаған дауысын естіпті. Бірақ оны жұбатуға ешкім әрекет етпеген. Көршілері пәтер есігін қаққанда үйді ешкім ашпаған. Белгілі болғандай, баланың анасы тамақ әзірлеген. Бірақ газ плитасын сөндіруді ұмытып, ұйықтап қалған.
«Алғашқы жетіп келген өрт сөндіру бөлімінің мамандары үшінші қабаттағы пәтердің ішіне өрт сатысы арқылы кіреді. Пәтердің асхана бөлмесінде газ плитада ыдыста тамақ қалып кеткен, салдарынан пәтер іші түтінге толған, өрт шықпаған. Өрт сөндірушілер 1979 жылғы азаматшаны және оның 3 жасар баласын қауіпсіз жерге шығарды. Оқиға орнына Өрт сөндіру қызметінің 14 қызметкері мен 4 дана техникасы, Апаттар медицинасы орталығы филиалының 3 қызметкері мен 1 дана техникасы жұмылдырылды. Алдын ала болжам бойынша азаматша масаң күйде болып, ұйықтап қалған»,-деді Шымкент қалалық ТЖД бастығының орынбасары Аманбек Бейсембаев.
