Қызылорда облысында заңсыз ойын бизнесін ұйымдастырған екі тұрғынға сот үкімі оқылды. Оның бірі ғимаратты жалға алса, екіншісі жалдамалы пәтерді ойынханаға айналдырған.
Қаржылық мониторинг агенттігінің мәліметінше, бұл бойынша қылмыстық іс ведомстваның аумақтық департаментінде тергелген.
«О.Цой заңсыз ойын мекемесін ашып, букмекерлік кеңсесінің атынан ғимарат жалға алған және 9 дербес компьютер алып интернет желісіне қосқан. Сараптама қорытындысына сай, желілік блоктарды пайдалану арқылы арнайы бағдарлама қолданып онлайн ойындар сайтына кірген. Букмекерлік кеңсе орнын аша отырып, қызмет көрсететін персонал ретінде үш адамды осы заңсыз қызметке тартқан. Ал Екінші азамат Қ.Наурызбаев пәтер жалға алып, «электронды рулетка» ойын құрылғысын орнатқан. Екі кісіні кассир қызметіне, екі кісіні күзетші ретінде жұмысқа қабылдаған»,-деді ведомствадағылар.
Сот үкімімен екі сотталушының бірі 1000 АЕК, екіншісін 200 АЕК айыппұл жазасын арқалады. Оларға тағайындалған айыппұл сомасын төлеуге бір ай мерзім уақыт берілді. Егер жалтарған жағдайда айыппұл мәжбүрлі түрде өндірілетін болады.
