Былтыр облыс шенеуніктерінің қызметтік көлігін сатып алу мен пайдалануға кетер шығынды азайту үшін жергілікті атқамінерлер жаппай таксиге отырғызылған еді. Осы бастама бойынша «Aqjaiyq» ӘКК» АҚ «Такси «Comfort» жеке компаниясына 30 жеңіл көлікті берді. Арадағы уағдаластыққа сай жеке кәсіпкер сенімді басқаруға берілген бұл техниканы кейін сатып алуға құқылы болды. Осы келісім бойынша жергілікті әкімдік мамандары мінген көліктің ақысын бюджет қаржысы есебінен төлеп отырды. Бірақ бұл жоба ақыры аяқсыз қалды.
— Өйткені әкімдік қызметкерлерінің көрсетілген қызмет сапасына көңілі толған жоқ. Олардың қызметі қанағаттанарлықсыз деген бағаға лайық болды. Осылайша тапсырыс беруші мен инвестор арасындағы жоба тоқтатылды. Ведомствоаралық комиссия бұл істі жүзеге асырудан бас тарту туралы шешім қабылдады, — деп мәлімдеді «Aqjaiyq» ӘКК» АҚ басқарма төрағасының орынбасары Дәурен Сүгірбаев. Осылайша таксимен қатынау ұнамаған оралдық шенеуніктер енді қызметтік көлігіне қайта мінді.
