Бүгін Түлкібас ауданындағы Абай мектеп-лицейінің және Б.Садықов жалпы орта мектебінің 2002 жылы түлеп ұшқан түлектері бірге оқыған сыныптас достарының соңында қалған жарына аудан орталығы Тұрар Рысқұлов ауылынан 4 бөлмелі үй алып беріп, қуанышқа бөледі.
«Осыдан бірнеше жыл бұрын күйеуі өмірден өткен Айкерім Сыздықова осы уақытқа дейін үш перзентімен жалдамалы пәтерде тұрып келген. Мұны естіген күйеуінің сыныптастары 20 жылдықта той тойлап, думандатқанша, өмірден өткен достың әруағына құран бағыштап, қиындыққа душар болған әйеліне үй сыйлауды өзара шешкен», — дейді аудандық әкімдіктің баспасөз қызметі.
Түлкібас ауданында 15 жылдан бері игі дәстүр жалғасын тауып келеді. Ол – мектеп түлектерінің қайырымдылыққа үлес қосып, мұқтаждарға баспана әперуі.
