Түркістан облысы Сарыағаш ауданындағы полицейлерге “Жібек жолы” шекара бекетіндегі есірткі контрабандасы бойынша күдікті туралы хабарлама келіп түскен. Анықталғандай, Өзбекстан Республикасынан Қазақстан еліне өтіп бара жатқан орта жастағы ер азаматқа «Капелла» атты қызметтік ит белгі берген. Шекарашылар бірден жедел тергеу тобын шақырған. Ер адамның Ресей Федерациясының азаматы екенін анықталды.
«Оқиға орнына келген полицейлер күдіктіні тінту кезінде іш киімінің ішінен есірткі тектес затты тәркілеп алды. Алынған зат сараптамаға жолданды. Сараптама қорытындысы бойынша тәркіленген заттың «гашиш» екені расталды»,-деді облыстық Полиция департаментіндегілер.
Аталған дерек Қылмыстық кодекстің 286-бабы (Айналыстан алып қойылған заттардың немесе айналысы шектелген заттардың контрабандасы) бойынша тіркелді. Қазіргі таңда шетел азаматына қатысты сотқа дейінгі тергеу амалдары жүргізілуде.
