Жетісу облысында ақша бопсалаумен айналысқан екі күдікті ұсталды.
Полицейлер ҰҚК облыстық департамент қызметкерлерінің көмегімен жергілікті кәсіпкерді қорқытып, ақша талап еткен екі күдіктіні дәмханадан құрықтады. ІІМ Telegram-каналының жазуынша, ұсталғандардан 500 мың теңге тәркіленді. Оны олар жәбірленушіден қорқытып алған.
«Күдіктілерді ұстау Алматы-Өскемен трассасының жол бойындағы дәмханалардың бірінде жүргізілді. Олардың бірі бұрын сотталған Алматының 53 жастағы тұрғыны болса, екіншісі Алакөл ауданының 35 жастағы тұрғыны. Қазіргі уақытта екеуі де уақытша ұстау изоляторына қамауға алынды», – деді Жетісу облыстық ПД ұйымдасқан қылмысқа қарсы күрес басқармасындағылар.
Аталған факті бойынша ҚР ҚК-нің 194-бабының 2-бөлігіне (қорқытып алу) сәйкес сотқа дейінгі тергеу амалдары жүргізілуде.
