Түркістан облысында тау шыңынан құлап кеткен ер адамның денесі табылды. Мәйітті облыстық Төтенше жағдайлар департаментінің құтқарушылары теңіз деңгейінен 3800 м биіктіктен тапқан.
Төтенше жағдайлар министрлігі баспасөз қызметінің мәліметінше, қазіргі таңда жоғалған туристің денесін тау басынан түсіру жұмыстары жүргізіліп жатыр. Қалыңдығы 20 см қар жамылғысы, жер бедерінің таулы, тасты болуы түсіру жұмыстарын қиындатуда екен.
Іздеу-құтқару жұмыстарына Түркістан облысының жедел-құтқару жасағының құтқарушылары мен Альпинизм федерациясының кәсіби альпинистері жұмылдырылды.
Еске алсақ, біз бұған дейін 3 шілдеде Сайрам-Өгем ұлттық табиғи паркінің аумағында теңіз деңгейінен 4236 м биіктіктегі таудың басынан түсу кезінде 1967 жылы дүниеге келген ер адамның мұз үстімен домалап, еңіске қарай құлап кеткені туралы жазған болатынбыз. Төмен түсу кезінде оның арқаны үзіліп кеткен.
