Шымкентте 30 жастағы жігіт қоғамдық тамақтану орнында тегін ас ішіп, азық-түлікке ақша үнемдеуді шешкен. Кассирлерге төлем жасау кезінде ол электронды аударымның жалған түбіртектерін көрсетіп, екі күн ішінде 5-6 рет тегін тамақтанған.
Тұрақты келушіге алданғанын білген дәмхана қызметкерлері бұл туралы полицияға хабарлаған. Аталған жайт Қылмыстық кодекстің 190-бабы «алаяқтық» бойынша тіркелді.
Тәртіп сақшылары мекеме камераларындағы бейнежазбаларды тексеріп, күдіктінің жеке басын анықтап, жас жігіттің қозғалыс бағытын нақтылаған.
Үш күндік іздеу жұмыстарының нәтижесінде тегін тамақ ішуге әуесқой азамат қала аумағында ұсталды.
«Ұсталған адам көктемде тонау қылмысын жасағаны үшін сот тағайындаған бас бостандығын шектеу жазасын әлі де өтеп жатқаны белгілі болды. Аталған жазаның өтелмеген мерзімін қосу арқылы сотталушы 3,5 жылға бас бостандығынан айырылды»,- деді Тұран АПБ-ның анықтаушысы Ернұр Әбубәкір.
