Биыл алғаш рет Ұстаздар күнін атап өту – 5 қазанға бекітілген. ҚР Үкіметімен тиісті қаулы қабылданған болатын. Осы уақытқа дейін елімізде мұғалімдер күні қазан айының бірінші жексенбісінде тойланып келді. Бұл күн Дүниежүзілік мұғалімдер күнімен сәйкестендірілген.
Оқу-ағарту министрлігінің мәліметінше, 5-қазанға елордада педагогтердің республикалық съезі өтеді. Оған еліміздің барлық аймақтарынан 700-ге жуық ұстаз қатысады. Кездесу алаңында педагогтер ең озық және халықаралық тәжірибелерімен бөлісе алады.
Айта кетейік, бүгінде Қазақстанның білім беру саласында 500 мыңға жуық мектепке дейінгі, орта, техникалық және кәсіптік білім беру маманы жұмыс істейді.
Төрт жыл ішінде ұстаздардың жалақысы екі есеге өсті. 220 мыңға жуық мұғалімге тағайындалған санаттарына қарай 50 пайызға дейін үстемеақы төленуде. Өндірістен қабылданған техникалық және кәсіптік білім беру ұстаздары жалақысына 35 пайызға дейін қосымша ақы алады. Осы жылдың қыркүйек айынан бастап 97 мың мұғалімнің жалақысы тағы 30 пайызға өсті.
