Қармақшы ауданы Ақжар ауылының тұрғыны ерекше әдіспен картоп екті. Ол егінге қажет суды үнемдеу үшін қойдың жүні мен сабанды пайдаланған, деп хабарлады Хабар 24.
Ауылға су келмегендіктен, Талғат Лекеров жер асты суын пайдалану арқылы картоп егуді қолға алған. Ол, қойдың жүнін төсеп, оған картоп тұқымын тастайды. Ал үстін сабанмен жауып, көңмен көмген. Арасы дымқылданып, картоп тез піседі екен. Ал жүн мен сабан шіріп, топыраққа құнар береді. Нәтижелі еңбегінің арқасында, бірнеше шаршы метр жерден 300 келі картоп жинап алған. Сонымен қатар, тұрғын картоптан бөлек, сәбізде еккен.
«Осы сәбіз 5 тамызда егілді. Бұлар енді күзге дейін піседі. Күннің салқынында сәбіз жақсы өседі. Түнде шық түседі қанша дегенмен. Өзі ығалданып, күзде егілген сәбіз көп суды қажет етпейді. Жер қызбайды, кеппейді асты. Сосын жер қатаймайды», – дейді Талғат Лекеров.
Бұл қарапайым отбасының бюджетін үнемдеуге айтарлықтай көмек бермек. Сондықтан, осы әдіспен өзге де өсімдіктерді жылда егуді қолға алмақ.
