Айта кетейік, жыл басынан бері 2021-2025 жылдарға арналған кәсіпкерлікті дамыту жөніндегі ұлттық жоба шеңберінде жаңа бизнес идеяларды іске асыру үшін 9 мың 93 грант берілген.
Еңбек және халықты әлеуметтік қорғау министрлігінің мәліметінше, үміткерлердің өтініштерін қарау жөніндегі комиссия өз жұмысын аяқтап, келісімшарттарға қол қою және грант алушыларға қаражат аудару процесі жалғасып жатыр.
Өтінімдердің ең көбі Түркістан (3,7 мың), Жамбыл (2,1 мың), Қызылорда (1,8 мың) облыстарының және Шымкент қаласының (1,8 мың), ең азы Ұлытау (120) және Қостанай (104) облыстарынан түскен. Нақтырақ айтар болсақ, гранттардың үшінші легі аясында үміткерлерден барлығы 15,5 мың, оның ішінде көпбалалы отбасылардан 9 мың, мүгедектігі бар адамдардан 3 мың, мүгедектігі бар балаға күтім жасайтын адамдардан 1,9 мың, атаулы әлеуметтік көмек алушылардан 771 өтініш қабылданды. Сондай-ақ асыраушысынан айырылған 586 адам, 57 қандас және 196 қоныс аударушы өтініш берілген.
Үміткерлер өздерінің бизнес-жобаларын комиссия отырыстарында таныстырады. Комиссия отырысының өткізілетін орны, күні мен уақыты туралы хабарлама Business.enbek.kz порталында грант алуға өтініш берушінің жеке кабинетінде көрсетіледі.
