2024 жылы Қазақстанда алғаш рет ана өлімінің ең төмен көрсеткіші тіркелді. Бұл туралы Денсаулық сақтау министрлігі хабарлады.
Өткен жылы жүкті әйелдердің өміріне қауіп төндіретін 706 ауыр жағдай тіркелді, олардың 95% жағдайында әйелдердің өмірі сақталып қалды. 2021 жылдан бастап ауыр жағдайлардың 40%-ға төмендеуі байқалады, алайда жүктілік кезінде алғаш рет диагноз қойылған ауыр соматикалық патологиялары бар жүкті әйелдердің өсуі байқалады.
Сонымен қатар, былтыр ұлттық шұғыл медицина орталығымен бірлесіп санитариялық авиация 165 ұшуды орындаған. Сондай-ақ, жергілікті жерде 9 әйелге операция жасалып, облыстық және республикалық клиникаларға тасымалданған ауыр жағдайдағы 127 әйелдің өмірін сақтап қалған.
«Аналар саулығы» бағдарламасының аясында жүктілікке дейін экстрагениталдық аурулардың анықталуын арттыру, әйелдердің контрацепциямен 40%-ға дейін және прегравидалдық даярлықпен 45%-ға дейін қамтылуын арттыру сынды жұмыстар жүргізілуде.
