Қазгидрометтің хабарлауынша, Шымкент қаласының аумағында 3 мамырдан бастап желдің жылдамдығы күшеюі туралы дауылды ескерту жарияланған. Синоптиктер дауылды жел 5 мамырға дейін жалғасады деп отыр.
Ауа райының қолайсыздығына байланысты, яғни қатты желдің (екпіні 12 м/с дейін) салдарынан Темірлан тас жолында орналасқан 9 қабатты тұрғын үйдің қасбеттік бөлігінің қаптамасының шамамен 6 шаршы метр аумақта жартылай бұзылуы орын алды. Адамдарға конструкциялардың құлау қаупі болған. ТЖД қызметкерлері қаптаманың бөлігін бекіту бойынша жұмыстар жүргізді. Азаматтарға қауіп жоқ.
Ал бүгін, 4 мамырда сағат 12:20-да Әл-Фараби ауданындағы Қабанбай батыр мен Ерманов көшелерінің қиылысында қатты желдің салдарынан (екпіні 23 м/с дейін) жеңіл автокөлікке ағаш құлады. Қайтыс болғандар мен зардап шеккендер жоқ.
Осы ретте қалалық Төтенше жағдайлар департаментіндегілер тұрғындардан барлық сақтық шараларын сақтауды, әсіресе жас балаларға мұқият болуды сұрайды.
