“Найза” шекаралық автомобиль өткізу пунктінде 20 тонна сыраны заңсыз әкету әрекетінің жолы кесілді. Бұл туралы Мемлекеттік кірістер комитетіндегілер хабарлады.
Алкоголь өнімдерін заңсыз әкетудің аталған фактісі Павлодар облысы бойынша Мемлекеттік кірістер департаменті қызметкерлерімен көлеңкелі экономикаға қарсы іс-қимыл шеңберінде анықталған.
Нәтижесінде жалпы көлемі 20 тонна болатын “сыра” алкоголь өнімі бар автокөлік ұсталды. Құжаттарды қарау және тексеру барысында алкоголь өнімінің тиісті құжаттар болмағаны анықталды.
«Бұл “Этил спирті мен алкоголь өнімінің өндірілуін және айналымын мемлекеттік реттеу туралы” Қазақстан Республикасының Заңын бұзушылық болып табылады. Қазіргі уақытта ҚР ӘҚБтК-нің 463-бабына сәйкес мемлекеттік кірістер органдарының қызметкерлерімен Успен аудандық сотына процессуалдық шешім қабылдау үшін материалдар жолданды» делінген мәліметте.
