Қаңтар оқиғасы кезінде Әл-Фараби атындағы Қазақ ұлттық университетінің ректоры Жансейіт Түймебаевтың ұлын кім атқаны белгілі болды. Бұл туралы белгілі журналист Михаил Козачков Telegram-каналында жазды.
«Күдікті ұсталып, уақытша ұстау изоляторына қамалды деген хабар жетті. Оның десантшы екені белгілі. Әзірге одан басқа ақпарат жоқ» делінген жазбада.
Еске салсақ, 6 қаңтар күні кешкі сағат 18.35 минут шамасында Алматыда ректордың 26 жастағы ұлы оқ жарақатынан көз жұмды. Ол Н.Назарбаев көшесімен жоғары көтеріліп, үйіне қайтып келе жатқан. Қ.Сәтпаев көшесіне жетпей, қиылыста тоқтап тұрған сәтінде көлігіне белгісіз адамдар бірнеше рет оқ атқан. Елнар Жансейітұлы оқиға орнында көз жұмды.
Ректор ұлының өлімі бойынша тергеу жұмыстары ІІМ әскери-тергеу басқармасына тапсырылды.
