Ақтауда суши-маркет желісінің 34 жастағы басшысы есірткі курьері болып жүрген. Оған 32 жастағы қызметкері заңсыз істе көмектескен.
Маңғыстау облыстық Полиция департаментінің мәліметінше, олар психотроптық заттардың партияларын жасырып, есірткіні буып-түю бойынша тапсырмалар мен координаттарды Telegram қосымшасы арқылы алып отырған.
Күдіктілердің тұрғылықты жері бойынша және компания кеңсесінде жүргізілген тінту кезінде 692 грамм “мефедрон” синтетикалық препараты тәркіленді. Аталған факті ҚР ҚК-нің 297-бабы 3-бөлігі 1 және 3-тармақтары бойынша (Адамдар тобының алдын ала сөз байласу арқылы есірткі, психотроптық заттарды, олардың аналогтарын өткізу мақсатында аса ірі мөлшерде сатып алуы, сақтауы, тасымалдауы) сараланған.
Маңғыстау облысының қылмыстық істер жөніндегі мамандандырылған ауданаралық сотында айыпталушыларға үкім оқылды. Сот есірткі және психотроптық заттарды жасырып кетушілерді 10 жылға бас бостандығынан айырды.
