Алматыда 29 және 34 жастағы екі ер азамат мешітте ұрлық жасауды кәсіпке айналдырып алған. Бостандық ауданының полицейлері Аллаға құлшылық жасау орнында жасалған 7 ұрлықтың бетін ашты.
«Жедел-іздестіру іс-шаралары барысында жұмыссыз екі ер адам ұсталды. Оның бірінің 5 қылмысқа қатыстылығы дәлелденді. Екіншісінің ұрлық қылмысының екі дерегіне қатысы бар. Екі айыпталушы да шаһардың ірі мешіттерінің бірінде бірнеше ұрлық жасаған. Жәбірленушілердің айтуынша, олар намаз кезінде телефондарын еденге қойып, құлшылық жасап болған байланыс құралдарының жоғалғанын байқаған. Ұсталғандар өз кінәларын мойындап отыр»,- деді Бостандық аудандық полиция басқармасының бастығы Мақсат Қанапяев.
Күдіктілердің әрекеті Қылмыстық кодексті 188-бабы бойынша тіркелді. Қазіргі уақытта қажетті тергеу амалдары жүргізілуде.
