Түркістан облысы Қазығұрт ауданында ауруханада жатқан егде жастағы тұрғын жұмбақ жағдайда жоғалып кетті. Оның ұлы полициядан көмек сұраған. Ер кісінің айтуынша, ауруханада ем қабылдап жатқан егде жастағы әкесі белгісіз бағытқа шығып кетіп, қайта оралмаған. Жергілікті тұрғын әкесін бірнеше сағат бойы өздігінен іздеп, таба алмаған.
«Аталған хабар бойынша қазығұрттық полицейлер ұшты-күйлі жоғалған қарияны табу мақсатында жедел-іздестіру жұмыстарына кірісті. Соның нәтижесінде із-түзсіз жоғалған егде жастағы қарияның жүрген жері анықталып, туыстарына аман-есен табысталды. Анықталғандай, тәртіп сақшылары қарияны шамамен 3-4 шақырым қашықтықтағы көрші ауыл маңынан жаяу кетіп бара жатқан жерінен тапқан» деп атап өтті облыстық Полиция департаментіндегілер.
