Әлеуметтік желіде кішкентай ғана балақайдың діни тақырыптарға сұрақтарға мүдірместен жауап беру кезінің видеосы пайда болды. Онда дастархан басында отырған Кәусар есімді бүлдіршеннің қойылған сұрақтарға тақылдап жауап бергенін көруге болады.
«Кәусар, сені кім жаратты?»,-дейді ер кісі. Бұл сауалға кішкентай қыз өзін Алла жаратқанын, діні ислам екенін алға тартады. Исламда иман, намаз, ораза, зекет және қажылық сынды бес парыз барын айтады.
Бүлдіршін Пайғамбарымыздың есімін біліп қана қоймай, ол «құрайыш» руынан екенін, оның әкесі Абдулла, анасы Әмина екенін де білетін болып шықты.
«Руың кім? Кітабың не? Мұсылмансың ба? Мұсылман екеніңді қалай дәлелдейсің?»,-дейді ер кісі.
«Руым – сиқым. Әльхамдулилләһ мұсылманмын. Ләә иләһә ил-лаллаһ Мұхәммәдер-Расүлуллаһ» деп жауап береді бүлдіршін.
Балабақша жасындағы қыздың мұндай сұрақтарға тақылдап отырып жауап беруі желі қолданушыларын таң қалдырды.
«Мен білмейтінді біледі екен, өзім ұялып қалдым», «Жартысын білмегенім үшін Аллаһым кешіре гөр», «Менің туысқаным екен. Алла осындай адамдар көбейе берсін», «Жарайсың, Алла тағала разы болсын», «Тіл-көзден аман бол, балапан», «Аллаға мың да бір шүкір», «Жаным сол. Алла разы болсын, көз тимесін», «Керемет» деп жазды желі қолданушылары.
