Отандық өнер жұлдызы Төреғали Төреәлінің үстінен қозғалған қылмыстық іс тоқтатылды.
Бұл туралы ІІМ-нің Telegram-каналы жазды.
«Бұған дейін Төреғали Төреғалиге қатысты ҚР ҚК-нің 293-бабы 1-бөлігі негізінде сотқа дейінгі тергеп-тексерудің бірыңғай тізіліміне тіркелген қылмыстық іс бойынша тараптардың татуласқанын хабарлаймыз. Нәтижесінде қылмыстық іс тоқтатылады» делінген ведомство мәліметінде.
ҚР Қылмыстық және қылмыстық іс жүргізу заңнамасының нормаларына сәйкес өлім-жітіммен байланысты емес, ауырлығы аз немесе орташа қылмыс жасаған адам, егер ол жәбірленушімен татуласса және келтірілген зиянды түзетсе, қылмыстық жауаптылықтан босатылуға жатады.
Еске салсақ, әнші Төреғали Төреәлінің үстінен ҚР ҚК-нің 293 – бабында көзделген қылмыс құрамының белгілері бойынша іс қозғалған болатын. Полиция департаментінің мәліметінше, 28 қыркүйек күні Алматы облысы, Кеген ауданында орналасқан “Көлсай көлдері” ұлттық паркінің аумағында өнер иесі жас жігітке тап берген.
Бұған дейін әлеуметтік желілерде видео тарап, онда жас жігіт өзіне әнші Төреғали Төрәлі тап беріп, қабағын жарғаны туралы айтқан. Қабағы жарылған жігіттің қасындағы бір топ адам өнер жұлдызының қол көтергенін растайды.
Осыдан кейін әнші уақытша ұстау изоляторына қамауға алынды. Кейінірек ол кепілдікке 10 миллион теңге төлеп, босап шыққан еді.
