Алматыда такси жүргізушісі Италиядан келген әйелді әуежайдан қонақүйге дейін 45 мың теңгеге жеткізген. Көлік жүргізіп, нәпақа тауып жүрген ер кісі шетелдік тұрғынды алдау арқылы көбірек ақша тапқысы келген көрінеді. Бұл туралы ҚР ІІМ Көліктегі полиция департаментіндегілер мәлімдеді.
Ведомства бастығының бірінші орынбасары Мадияр Айтуғановтың айтуынша, Алматы әуежайындағы Желілік полиция бөліміне қала тұрғыны хабарласып, Италия азаматшасын әуежайдан қонақ үйге дейін қасақана жоғары бағамен тасымалдаған такси жүргізушісіне қатысты шара қолдану туралы өтініш түскен.
Жедел-іздестіру шараларын жүргізу барысында такси жүргізушісінің жеке басы анықталыпты. Ол Алматы облысының 48 жастағы тұрғыны болып шықты.
«Ер адам шетелдік әйелді әдейі жаңылыстырып, Бөгенбай батыр көшесінде орналасқан қонақ үйге дейін жоғары төлем алған. Жүргізуші келтірген залалды өтеді. Ол ҚР ӘҚБтК-нің 449-бабының 1-бөлігімен әкімшілік жауапкершілікке тартылды», – деп түйіндеді сөзін Мадияр Айтуғанов.
