Шымкентте көпбалалы отбасы қымыз бизнесін дөңгелетіп отыр.
Қала тұрғыны Құдайберген Иманалиев спорт жаттықтырушысы болған. Алайда жылқы малына деген қызығушылығы басым түсіп, 7 баланың әкесі былтыр мемлекеттен алған қайтарымсыз грант қаражатына екі бие сатып алған. Көпбалалы отбасы содан бері бие сауып, қымыз сатуды кәсіпке айналдырған. Бүгінде қорасында мал басы да артқан.
“Жылқы малы – төрт түліктің төресі. Ұл-қыздарымның несібесі болса керек, кәсібім тұрақты табыс әкелуде. Бие сүті көрші-қолаңнан да артылмай жатыр. Қымызын қаладағы ұлттық тағам әзірлейтін мейрамханалар сатып алады. Ұлым тіпті мал дәрігерлігіне оқуға түсті. Бұйырса алдағы уақытта мал басын көбейтіп, кәсіпті кеңейтпек ойымыз бар”, – дейді Құдайберген Иманалиев.
Әкімдікттің баспасөз қызметінің мәліметінше, Шымкентте былтыр 1195 азамат 400 айлық есептік көрсеткішке дейінгі мөлшерде мемлекеттік грант иегері атанған болатын. Биыл әлеуметтік осал топты азаматтарға арналған грантты жалпы саны 447 адамға беру жоспарланған. Жыл басынан бері өткізілген бірінші және екінші лектің нәтижесінде 228 азамат оң қорытынды алды.
2023 жылдың 11 қыркүйегінен бастап III-лек бойынша өтінім қабылдау басталды. Қазірдің өзінде 300-ден астам азаматтан өтінім түскен. Үміткерлердің бизнес-жоспарларын әлеуметтік әлеуетіне қарай тәуелсіз комиссия құрамы іріктейді. Комиссия мүшелері қоғам белсенділері, БАҚ өкілдері, кәсіпкерлер мен қоғамдық бірлестіктердің өкілдерінен құралған. Өтінімдер «Business.enbek.kz» порталында электрондық цифрлық қолтаңба арқылы онлайн режимінде 11-22 қыркүйек күндері аралығында қабылданады.
Шымкент қалалық жұмыспен қамту және әлеуметтік қорғау басқармасының басшысы Балмаржан Нарбекованың желі парақшасында жазған мәліметке сүйенеск, халықтың әл-ауқатын жақсартуда мемлекеттік қайтарымсыз гранттың үлесі орасан. Соңғы үш жылда атаулы әлеуметтік көмек алушылар қатары азайып, керісінше жұмыспен қамтылғандар мен қайтарымсыз гранттың арқасында өз кәсібін ашқан шымкенттіктердің қатары артуда.
«Жеке кәсібін ашқысы келетін азаматтарды осы мүмкіндікті пайдалануға шақырғым келеді. Ең бастысы бизнес-жоспарларыңызды әзірлегенде қаражатты мақсатты жұмсауларыңызды нақты көрсетіп, комиссия отырысында бизнес идеяларыңызды қорғауларыңыз қажет. Өйткені грант үміткерлердің өтініштерін қарау жөніндегі тәуелсіз комиссиялардың шешімі негізінде беріледі. Олар әр өтінімді егжей-тегжейлі зерделей отырып, әділ шешім қабылдауға тырысады», – деп жазды басқарма басшысы.
