Жамбыл облысы Шу қаласының маңындағы құмды аумақта орналасқан “Бетқара” шаруа қожалығында 38 және 27 жастағы жергілікті тұрғындар ұсталды. Шаруа қожалық аумағында тінту жүргізу барысында сарайдан жалпы салмағы 73 келі 120 грамм “кептірілген марихуана” және 570 грамм “гашиш” есірткі заты бар 8 полипропилен қабы мен полиэтилен пакеті табылды.
Ұсталғандар өз кінәсін толық мойындады. Олар Меркі ауданының уақытша ұстау изоляторына қамауға алынды.
Айта кету керек, күдікті 38 жастағы азамат бұрын бірнеше рет сотты болған.
«Қылмыстық кодекстің 297-бабы 3-бөлігі (Есірткі құралдарын аса ірі мөлшерде өткізу мақсатында заңсыз сақтау) бойынша сотқа дейінгі тергеп-тексеру амалдары басталды. Бұл бапта мүлкі тәркіленіп, он жылдан он бес жылға дейінгі мерзімге бас бостандығынан айыру түріндегі жаза қарастырылған», – деді Жамбыл облыстық ПД Есірткі қылмысына қарсы іс-қимыл басқармасының бастығы Әлім Бажықбаев.
