Шымкентте 22 жасар науқасқа туған ағасы бүйрегін берді. Дәрігерлердің айтуынша, бүйрек трансплантациясы сәтті өтті.
Денсаулық сақтау басқармасының хабарлауынша, N1 қалалық клиникалық аурухана базасында өткен ағза алмастыру отасын дәрігерлер екі кезеңмен жасады. Білікті дәрігерлер командасы донордан бүйрек алып, кейін ағзаны рецепиентке хирургиялық жолмен салып берді.
“Донор 1996 жылғы қала тұрғыны. Рецепиент 2001 жылғы, сырқатына байланысты 6 жылдан бері гемодиализ аппаратына тәуелді болған. Науқасқа туған ағасы бүйрегін берді. Операция сәтті өтті. Екі пациенттің отадан кейінгі жағдайы жақсы” делінген басқарма мәліметінде.
Дәрігерлер ағзасын берген донорды ауруханадан үйіне шығарды. Ақ халаттылар мұндай ота бүйрек жетіспеушілігімен есепте тұратын науқастардың сауығып кетуіне зор мүмкіндік беретінін алға тартты.
