Қайғылы оқиғаның біреуі кеше түнде қаладағы “Tropicana” жағажайында болған. Облыстық төтенше жағдайлар департаментінің ақпараты бойынша, құтқарушылар 27 жастағы жігіттің мәйітін жағадан 10 метр жерде 2 метр тереңдіктен шығарып алған. Куәгерлер жігіттің мас күйінде суға түскенін айтқан. Сот-медициналық сараптама тағайындалды.
Екінші жағдай Мұғалжар ауданы, Шеңгелши ауылы маңында тіркелді. Жем өзеніне 34 жастағы жігіт батып кетті. “Ол — Талдықорған қаласының тұрғыны. Ақтөбеге қызмет бабымен келген. Әріптестерімен жұмыстан кейін су жағасында демалған. Жігіт жүзу білмеген. Оның денесі бүгін таңертең 4 метр тереңдіктен шығарылды”, — дейді Ақтөбе облыстық төтенше жағдайлар департаменті азаматтық қорғаныс басқармасы бастығының міндетін атқарушы Иса Байтұрсынов.
Жыл басынан бері Ақтөбе облысында 10 адам суға кеткен, соның бесеуі — бала.
