Атырау қаласынан Құрманғазы ауданына қатынайтын жолаушылар пойызына балаша қуанған тұрғындар енді билет таппай сабылып жүр. Қалаға келіп қажетін қамдаған соң ауылға уақытында қайта алмаған халық вагон санын көбейтуді талап етуде. Бар-жоғы 3 вагон тым аз,- дейді.
Былтыр тамыз айында қатынай бастаған пойызда алғашында 3 вагон жүріп, кейін тағы екі вагон қосылған еді. Алайда қаржы жетпегеннен кейін тоқтатып тастапты.
«Қазір 3 вагон жүріп жатыр. 2 вагон қостырған едік. Субсидия төлей алмай отырмыз. Сондықтан тиімді болмағандықтан кері алып тастады. Биыл жыл соңына дейін 3 вагонмен жүру үшін 229 млн теңге бөлінді. Қазір Атырау – Астрахань пойызы күнара жүріп жатыр. Аудан тұрғындары сонымен қатынай алады»,- деді облыстық жолаушылар көлігі және автомобиль жолдары басқармасының басшысы Самат Айтқалиев.
Самат Айтқалиевтың айтуынша, облыстық мәслихаттың маусым айындағы отырысында қосымша қаржы бөлуді ұсынбақ. Депутаттар қолдаса тағы екі вагонның қосылуы бек мүмкін.
