Құрманғазы аудандық ауруханасының инфекционист дәрігері мен анестезиолог-реаниматологына кәсіптік міндеттерін тиісінше орындамауы абайсызда адам өліміне әкеп соққан іс-әрекеттер жасады деп айып тағылды. Салдарынан 44 жастағы Бекдидар Көргенәлиев былтыр 1 қаңтар күні қайтыс болған еді. Марқұмның соңында кәмелетке толмаған 3 баласы қалды.
Судья сотталушылардың кінәсі жәбірленушілер мен куәлардың, сондай-ақ, сарапшылар айғағы мен сот-медициналық сараптаманың қорытындысымен дәлелденгенін айтты. Дәрігерлерге 2 жыл және 2,5 жыл бас бостандығынан айыру жазасын кесті. Бірақ ақ халаттылар рақымшылыққа ілігіп, бас бостандығынан айыру жазасынан босатылды.
«Сотталушыларға дәрігерлік қызметпен айналысу құқынан айыру жазасын тағайындай отырып, бас бостандығынан айыру жазасы тағайындалды. Алайда ҚР 30 жылдығына байланысты «Рақымшылық жасау жөніндегі» заңы негізінде бас бостандығынан айыру жазасынан босатылды. Дәрігерлік қызметпен айналысу құқынан айыру түріндегі жаза заңда көзделмеген,»- деді Құрманғазы аудандық сотының судьясы Бейбітгүл Меңсейітова.
Инфекционист 3 жыл, ал реанимотолог-дәрігер 2 жыл алты ай кәсіби міндетін атқара алмайды. Сондай-ақ жәбірленушілердің пайдасына 8 млн. теңге моральдық өтемақы төлеу міндеттелді.
