Еліміздегі эпидемиологиялық ахуалға байланысты мектеп оқушылары жаңа оқу жылын қашықтан оқи ма? Көптің көкейінде жүрген сұраққа Орталық коммуникациялар қызметінде өткен брифинг кезінде Денсаулық сақтау министрлігі, инфекциялық ауруларды эпидемологиялық бақылау басқармасының басшысы Роза Қожапова жауап берді.
Басқарма басшысының пікірінше, қазір нақты дөп басып айту қиын.
«Мектептерді, қандай да бір білім мекемелерін қашықтан немесе жартылай қашықтан оқыту форматына көшіру оқу жылы басталуға жақын қалған кездегі жағдайға байланысты қаралады. Бұған дейінгі уақытта науқастанудың артуы әртүрлі ұзақтықта болды. Бізде вирустың соңғы өршіген кезі — 20 маусым. Қазіргі уақытта дәл қыркүйек айында жағдайдың қалай өрбитінін айта алмаймыз. Сондықтан оқыту қандай форматта өтетінін шамамен тамыз айының екінші жартысына қарай айта аламыз. Жағдай сол уақытта балалардың арасында аурудың қаншалықты таралуына байланысты болады» деп атап өтті ол.
