Шымкент қаласының тұрғыны екі жыл бойы азаматтарға «мемлекеттік бағдарламамен пәтер алуға көмектесемін» деп алдап келген. Алаяқтың арбауына 21 тұрғын түсіп, жалпы сомасы 34 млн ақша берген.
Алаяқтықты кәсіп еткен 27 жастағы азаматша қала аумағында соғылып жатқан көпқабатты тұрғын үйлерден танысы арқылы пәтер алып бере алатындығын айтып, елдің сеніміне кірген. Жарнамасы жер жарғандықтан көпшілік иланып, берген ақшаларын өз пайдасына жаратып отырған.
Ол сондай-ақ, балаларына қарау үшін үйіне жұмысқа алған азаматшаның банк кәртішкесін қолдануға алдап сұрап алып, ұялы телефонына оның қосымшасын орнатып алған. Содан басқа жәбірленушілердің ақшалары осы кәртішкеге түскен. Бұл туралы жәбірленуші кейіннен біліп, полицияға арызданған. Полицияның дерегінше, ол бұдан өзге жәбірленушілерден алған ақшаны да кездейсоқ адамдарға өтініш жасап, банкоматтардан шешіп жүріпті.
Ал уәде етілген үйге қолы жетпей, алданғанын білген тұрғындар полицияға арызданған. Тәртіп сақшыларымен жүргізілген жедел-іздестіру жұмыстары барысында, куәлерден жауап алып, сұрастыру жұмыстары жүргізіліп, банктік аударымдар тексеріліп, азаматшаның алаяқтық ісі дәлелденген.
