Жамбыл облысында ішіп алып көлік тізгіндеген ер азамат 5 жылға бас бостандығынан айырылуы мүмкін.
Полиция департаментінің дерегінше, Сарысу ауданында «Нива» маркалы көлікті мас күйінде басқарған Жаңатас қаласының 57 жастағы тұрғыны ұсталды. Ол полиция қызметкерлерінің заңды талабына бағынбай, жол қозғалысы ережесін өрескел бұза отырып, қашып кетуге тырысқан. Ұсталған жүргізуші бұған дейін сот шешімімен көлік жүргізу куәлігінен айырылған екен.
«Аталған дерек бойынша ҚР ҚК 346-бабы 1-бөлігі (көлік құралдарын басқару құқығынан айырылған және алкогольдік масаң күйдегі адамның көлік құралын басқаруы) бойынша сотқа дейінгі тергеу амалдары басталды. Бұл бап бойынша бес жылға дейін бас бостандығынан айыру жазасы көзделген», — деді Сарысу аудандық ПБ бастығы Асхат Алметов.
