Бәйдібек ауданына қарасты Боралдай ауылдық округінде тұрғындардың бірінің ауласындағы ауыз су құбырынан өлі жылан шықты. Оны жергілікті тұрғындар видеоға түсіріп алған. Үй иесі құбырға кептеліп қалған жыланды барынша тартып, суырып алады. Күнделікті тұтынып жүрген ауыз су құбырынан шыққан жылан ұзындығы шамамен 1,5 метрдей. Бұл видео тұрғындар арасында лезде тарап, жұрттың зәресін алып отыр.
Ал ауыз сумен қамтамасыз етуші «Бәйдібек су» коммуналдық мекемесіндегілер халықты сабырға шақырды. Өйткені жылан су құбырының ішінде жүрмеген. Ол ашық тұрған құбыр аузына сырттан кірген деп сендірді жауаптылар. Дегенмен мамандар Боралдай ауылының ауыз су жинайтын резервуары мен құбырларының суы толық төгіліп, «Бәйдібек су» мекемесі тарапынан залалсыздандыру жұмыстары жүргізіліп жатқанын мәлімдеді.
