Жол апаты Сайрам ауданының тұсында жексенбі күні сағат 21:30 шамасында болды.
Полицияның дерегінше, «TOYOTA ALPARD» маркалы автокөлігінің жүргізушісі «Батыс Еуропа-Батыс Қытай» тас жолының 4-шақырымында, Алматы қаласынан Қызылорда бағытына қарай келе жатып, өзімен бір бағытта, яғни алдында кетіп бара жатқан «HOWO» маркалы жүк көлігінің артқы бөлігіне соқтығысқан.
«Апатты жағдай кезінде, «TOYOTA ALPARD» көлігінің жолаушысы жедел жәрдем көлігінде өзіне келмей қайтыс болды. Ал 7 жолаушы түрлі дене жарақаттарымен жақын маңдағы ауруханаларға жеткізілген. Олардың бірқатары дәрігерге көрінген соң үйлеріне қайтқан. Сайрам АПБ полицейлерімен аталған жайт ҚР ҚК-нің 345-бабы 3-бөлігімен «Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы» бойынша тіркеуге алынды. Автокөліктер айыптұраққа қойылды. Бүгінде оқиғаның толық мән-жайын анықтау шаралары жүргізілуде», деп хабарлады Түркістан облыстық Полиция департаментінің баспасөз хатшысы.
