Бұл туралы білім және ғылым министрі Асхат Аймағамбетов айтты. Министр оқушыларының алдында ыңғайсыз жағдайға қалған ұстазбен телефон арқылы сөйлесіп, қолдау білдіріпті. Биология пәнінің оқытушысы білім саласында 11 жылдан бері қызмет етіп келеді.
«Өз тарапымыздан педагогтерге деген мұндай қарым-қатынасты, көзқарасты жойып, жолын кесу үшін қатаң шаралар қабылдайтынымызды ескертемін. Қоғамда мұғалімнің мәртебесі жоғары болуы керек», — деп жазған Білім және ғылым министрі.
Бұған дейін министрліктің өкілі келеңсіз жағдайға байланысты мұғалімнің полицияға арыз тастағанын айтқан еді. Оның мәлімдеуінше, оқушыға қатысты әкімшілік хаттама толтырылған. Шешімді Алматы облысының кәмелетке толмағандардың істері жөніндегі мамандандырылған ауданаралық соты қабылдайды.
Айта кетейік, бұл жағдай 11-наурыз күні Алматы облысы Талдықорған қаласындағы № 4 мектепте болған. Оқушының дөрекі қылығы әлеуметтік желі қолданушыларының арасында қызу талқыланып жатыр.
