Қаржылық мониторинг агенттігінің Қызылорда облысы бойынша департаменті жүргізілген қылмыстық іс бойынша сот үкімі шықты. Аталған іс бойынша ірі көлемде инвестициялық субсидия қаражатын талан-таражға салып, әрі қарай жымқыру дерегі бойынша облыстық ауылшаруашылық басқармасының лауазымды тұлғалары сотталды.
Агенттіктің мәліметінше, шенеуніктер бірнеше шаруа қожалықтарында ешқандай жұмыс атқарылмай, жабдықтар қойылмай, жұмыстың толық орындалғаны туралы жалған құжат әзірлеген. Ақпаратты «Qoldau.kz» жүйесіне енгізіп, субсидия беру туралы өтінімге электронды қол қойған. Келтірілген шығын — 25 млн теңге.
Өз кезегінде кәсіпкер тұлғалар келісімшарт сомасының 10% көлемінде сыйақы үшін жалған құжат әзірлеп, қаржы жымқырған.
«Сот үкімімен облыстық ауылшаруашылық басқармасының бөлім басшысы мен бас маманы кінәлі деп танылды. Олар мемлекеттік ұйымдарда материалдық немесе қаржы аударымына негіз болатын құжаттарға қол қою құқығы жүктелетін лауазымдарды атқару құқығынан 3 жылға айыра отырып, 2 жыл мерзімге шартты түрде бас бостандығын шектеу жазасын алды» деп хабарлады ведомствоның баспасөз қызметі.
