Әлеуметтік желілерде елімізде өткен тойлардың бірінде түсірілген видео пайда болды. Той иесі ұтыс ойынына бір қап қант қойған себебін шекер тапшылығымен байланыстырады. Ал асаба мұнша қантты көрмегелі біраз болғанын айтып, «қаптың ішіндегі расымен қант па?» деп қалжыңдап сұрайды.
Ұтыс ойынында Мақпал есімді келіншек жеңімпаз атанды. Ортаға шыққан ол жеңімпаз атану күтпеген жайт болғанын айтады. Оның артынша жұбайы ортаға шығып, бір қап қантты иығына салып алып кетеді.
Видеоны көрген желідегілер тойда болған жайтты қызу талқылап жатыр. Басым көпшілігі мұны қалжың ретінде қабылдады.
«Қант ең бағалы сыйлықтардың қатарына еніп жатыр», «Тойға әкелген ақшаны шығарып алды», «Мен негізі мұндай ойындарға мүлдем қатыспаймын, бірақ 25 кг қант үшін бас тартпас едім», «30 жылда жеткен жетістігіміз», «Масқара, жеткен жеріміз осы ма енді?», «Маған да бұйырсыншы», «Идея күшті екен», «Жақын күндері «нан ұрсын» дегеннің орнына «қант ұрсын» дейтін шығармыз» деп жазды желі қолданушылары.
